Испания терма жамоаси ярим ҳимоячиси Сеск Фабрегас жамоа билан 2016 йилги Европа чемпионатида иштирок этиш учун Францияга келганидан мамнун эканини билдирди.
«Мен Испания терма жамоасига 10 йил давомида жалб этиб келинмоқдаман ва кўп марталаб майдонда муҳим паллаларни ўтказдим. Мен терма жамоанинг турли авлодлари қаторида майдонга тушиш имконига эга бўлдим ва бундан бахтиёрман. Одатда футболчи терма жамоа билан бир марта ютуққа эришиши катта натижа ҳисобланади, баъзилар бунга икки марта эришади, мен эса бундай лаҳзаларни 3 ёки 4 марта ҳис қилдим ва олдинда яна совриндор бўлиш имконияти бор.
Бундай натижага эришиш учун камида иқтидорли ва профессионал бўлиш талаб этилади. Агар олдинга аниқ мақсад қўя олмасанг, иқтидорли бўлишнинг ўзи камлик қилади.
Футболчилар эрта тонгда уйғонишлари ва об-ҳаво қандай бўлишидан қатъи назар, ёмғир ёғиб турган бўлса ҳам, қуёш қиздираётган бўлса ҳам машғулотга йўл олишлари керак. Ўз устингда ишлашинг, янада яхшироқ бўлишга интилишинг ва ўйиндан завқ олишинг керак. Буларнинг барчаси ғалаба кайфиятини келтиради», — дея Фабрегаснинг сўзларини келтиради УЕФА расмий сайти.
Испания терма жамоаси Европа чемпионатидаги иштирокини 13 июнь куни Чехияга қарши майдонга тушиш орқали бошлайди. 2008 ва 2012 йилги чемпионат чемпионларининг гуруҳдаги бошқа рақиблари Ирландия ва Швеция ҳисобланади
