Бельгия терма жамоаси бош мураббийи Марк Вильмотс Евро чемпионатининг 1-тури доирасида Италияга қарши ўйин (0:2) борасида ўз фикрларини билдириб ўтди.

«Индивидуал хатоларга йўл қўйдик ва биринчи голдан кейин Италия қулай ҳолатга ўтиб олди. Иккинчи бўлимда кўпроқ ҳужумда ўйнашга ҳаракат қилдик. Шунинг учун Наингголанни майдондан олиб, ўрнига Мертенсни туширдим. Қанотларда фаолликни оширишни истадим.

Лукаку ўзининг энг яхши ўйинини ўтказмади, де Брюйне янада яхшироқ ўйнаши мумкин, аммо ҳозир буни муҳокама қиладиган пайт эмас. Нимчорак финалга чиқиш учун жипслашишимиз керак.

Де Брюйненинг ўйини ҳақида нима дейишни билмайман. Бу саволга менда жавоб бўлганида, жавоб берган бўлардим. Балки у қийин ўтган мавсумдан кейин чарчагандир. У мазкур ўйинга тайёрланган эди. Сўнгги 4 йилда Кевин терма жамоага кўп нарса берди. У жарима зарбаларидан гол ура олади ва ажойиб узатмалар беради.

Бонуччи 40 метрдан узатма берганида, концентрацияни бой бердик. Бундай даражадаги ўйинларда хато қилиш ярамайди. Иккинчи бўлимни мен ўйинни кўра олгандек кўрганингизга ишончим комил эмас. Италияликлар 10 киши бўлиб ҳимояланишди. Қани бузиб кўр», – деди Вильмотс.