Ўз тарихида илк марта Европа чемпионатида иштирок этаётган Албания терма жамоаси гуруҳнинг сўнгги турида ғалаба қозонишга муваффақ бўлди. Плей-оффга чиқиш учун яхши имкониятга эга бўлган Руминия эса, кутилмаганда, ютқазиб қўйди.

Ўйин боишда руминларнинг ўйинга нисбатан иштиёқи юқори бўлмади. Улар ё рақибни менсишмади, ёки ғалаба қозонишларига ҳаддан ташқари ишонган ҳолда майдонга тушди. Шу боис, уларнинг ўйини қовушмади. Баҳснинг дебютида асосан ҳимоявий ўйин кўрсатган Албания эса рақибининг хатоларидан кейин олдинга ўта бошлади. Танаффусга қадар албанлар голга тортадиган 3та вазият яратишди. Леняни ва Баша қулай вазиятлардан дарвозага аниқ зарба бера олишмади. Бўлим тугаши арафасида ниҳоят ҳисоб очилди. Ўнг қанотдан ҳаволатиб етказилган узатма Садику дарвозабон майдончаси бурчагидан бош билан дарвозага жойлади. Дарвозабон тўпга чиқишда, ҳимоячи жой танлашда хатога йўл қўйди. Бу Албаниянинг Европа чемппионатларидаги илк голи эди.

Иккинчи бўлимда Руминия ўзига келди, кетма-кет ҳужумлар қилди. Бир вазиятда Станкунинг зарбаси тўсинга тегиб қайтди. Албанияликлар яхши ҳимояланишди ва ғалабани ўзларида сақлаб қолишди.

Руминия 1 очко билан Францияни тарк этадиган бўлди. Уч очко билан гуруҳда 3-ўринни эгаллаган Албания гуруҳ босқичигача кутади ва энг яхши 4та 3-ўрин эгаси сифатида плей-оффга чиқишга умид қилади.

Евро-2016, "А" гуруҳи, 3-тур
Руминия – Албания 0:1 (0:1, 0:0)
Гол: 0:1 – 43 Садику.
Руминия – Тэтэрушану, Григоре, Мэцел, Сэпунару, Кирикеш, Попа (Андоне, 68), Хобан, Препелицэ (Синмэртян, 46), Станчу, Станку, Алибек (Торже, 57).
Албания – Бериша, Леняни (Роши, 77), Маврай, Айети, Лиля, Мемушай, Баша (Цана, 83), Хюсай, Абраши, Аголи, Садику (Балай, 59).
Огоҳлантиришлар: Баша (6), Мэцел (53), Мемушай (85), Сэпунару (85), Торже (90), Хюсай (90).