Бугун «Навбаҳор» мураббийларининг ёппасига истеъфосидан сўнг барчани эндиликда жамоани ким бошқариши қизиқтирмоқда.

Шуниси аҳамиятлики, клуб раҳбарияти Александр Волков бош мураббий этиб тайинлангач, мутахассисга камида биринчи давра якунигача имконият берилганди. Мураббий ва футболчилар зиммаларидаги вазифаларни бажара олишмаса давралар оралиғида ўзаро тузилган шартномаларни кўриб чиқиш ҳақида огоҳлантирилганди. Лекин якунда бундай бўлиб чиқмади. Фикримизча, Волковга биринчи давра охиригача ишониш лозим эди. Олдинда икки муҳим учрашув кутиб турганди. Бугунги ўзгариш футболчиларга қандай таъсир кўрсатиши тўғриси бизга қоронғу.

Бугун шунингдек, «Андижон» жамоаси мураббийлар штабида ҳам ўзгариш бўлди. Бахтиёр Ашурматов Андижонни тарк этди. Ҳозирда айрим «Навбаҳор» мухлислари Бахтиёр Аъзамовични Наманганга қайтиши ҳақида гапирмоқда. Бунга аниқлик киритиш учун Ашурматов билан боғланишга ҳаракат қилдик, аммо алоқага чиқолмадик. Мутахассиснинг яқинларидан бири билан бу ҳақда суҳбатлашганимизда, Ашурматов бироз ҳордиқ чиқаришини таъкидлаб ўтди. «Навбаҳор»га қайтиши ҳақида сўраганимизда эса, суҳбатдошимиз елка қисиш билан кифояланди.

Клуб раҳбарияти бир нечта мутахассислар номзодини кўриб чиқмоқда. Тасдиқланмаган маълумотларга кўра, номзодлар орасида Усмон Асқаралиев, Раҳим Қурбонмамедов, Рустам Забиров, Виктор Жалилов, Вадим Абрамов сингари мураббийлар бор. «Навбаҳор»да ҳар қандай ўзгариш бўлиши мумкин. Балки, Бахтиёр Ашурматов яна жамоага қайтар? Фақат буни вақт кўрсатади.

Бизга эса, ким бош мураббий бўлишидан қатъий назар, «Навбаҳор» мазмунли ўйинлар кўрсатса, юқори ўринлар учун курашса бас!