26 июнь куни "Пахтакор" олий лиганинг 14-турида "Олмалиқ"ни қабул қилади.

Биринчи даврада уйдаги охирги учрашув якшанба куни "Олмалиқ"қа қарши ўтказилади. Игорь Шквирин жамоаси мавсумни омадсиз бошлаб, сўнгги турларда ўзига келишга улгурди. 13-турдан кейин ҳар икки жамоа ўйинга тайёргарлик кўриш билан банд бўлди. Беллашувни "Пахтакор" ҳимоячиси Даврон Ҳошимов сариқ карточкалари сабабли ўтказиб юборади.
 
Қарама-қаршилик
Олий лигада жамоалар 16 учрашувда майдонга тушишган. Уларнинг 11тасида жамоамиз, 3тасида рақиб зафар қучган. 2 баҳс дуранг билан тугаган. Тўп киритиш борасида "Пахтакор" устун, 25-9. Тошкентдаги 8 ўйинда "шерлар" 5 ғалаба, 2 дуранг ва 1 мағлубият қайд этишган.

Ўйин расмийлари
Учрашувни Дмитрий Пислегин бошқариб боради. Назоратчи сифатида Фарҳод Абдуллаев, ПФЛ вакили сифатида Фарҳод Магометов ишлайди.
 
"ПАХТАКОР" - "ОЛМАЛИҚ"
Ҳакамлар: Дмитрий Пислегин (Тошкент), Тимур Гайнулин (Тошкент), Наби Рўзимов (Тошкент), Равшан Копадзе (Фарғона).
Назоратчи: Фарҳод Абдуллаев (Тошкент).
ПФЛ вакили: Фарҳод Магометов.
 
Чипталар
Ўйинга чипталарни стадион кассаларидан 5 ва 15 минг сўмдан харид қилишингиз мумкин. Ёшлар жамоалари 25 июнь, шанба куни Қибрайда соат 17:45да учрашувни бошлашади. Асосий таркиблар баҳсига эса 26 июнь, якшанба куни "Пахтакор" стадионида 19:20да старт берилади.