“Навбаҳор” – “Бунёдкор” учрашувидан кейинги матбуот анжуманининг биринчи қисмида “қалдирғочлар” устози қатнашди.

- Натижадан хурсандман. Бироқ, биз жуда кўп имкониятлардан фойдалана олмадик. Баъзи ҳолларда эса қулай имкониятга чиқишда сусткашликка йўл қўйдик. 10тача имкониятдан 3та гол урдик. Қолаверса, хатоларга йўл қўйдик. Балки бу чарчоқ билан боғлиқдир. Нима бўлган тақдирда ҳам йигитларга ғалаба учун раҳмат айтдим. Рақибда ҳам голли вазиятлар бўлди. Қаердадир бизга омад кулиб боқди. Олдинда бизни асосий ўйин – “Локомотив”га қарши баҳс кутиб турибди. Олдимиздаги беш кун давомида бор эътиборимизни айнан ушбу баҳсга қаратамиз.

Ортда қолган 14та учрашувда олти очко йўқотдик. Энг аламлиси, бой берилган очколар биздан кучли бўлмаган рақиблар билан бўлган баҳсларга тўғри келди. Чемпионлик учун курашаётган клуб, ўзидан кучли бўлмаган рақиблар билан баҳсда очко йўқотмаслиги керак. Афсуски, вақтни орқага қайтариб бўлмайди. Бундан кейин эътиборлироқ бўлиб, очко йўқотмасликка ҳаракат қиламиз. Ана шунда иккинчи даврада чемпионлик учун яна ҳам астойдил кураша оламиз, - дейди Сергей Иванович.