Англия терма жамоасининг янги умиди — Деле Алли Евро-2016 тобора қизиб бораётган пайт мухлислар билан билвосита мулоқот қилишга вақт ажрата олди. Яъни FA TV лойиҳаси доирасида интервью беришга кўнди. Янада аниқроқ ифода этсак, футболчи фанатлардан тушган саволларга бирма-бир жавоб берди.
- Уэльс термасига қарши ўйиндан сўнг Бен Дэвисга яқинлашиб, кўз ёшини артиши учун унга рўмолча тутқаздингиз...
- Ҳа, шундай. Стадиондан чиққач ҳам, Бен билан дилдан суҳбатлашдим, аммо рўмолчани эсга солганим йўқ.
- Айтингчи, Эрик Дайер билан қандай дўстлашгансиз?
- Эрик дуч келган кишини қучоқ очиб кутиб оладиган одамлар тоифасидан. Мен «Тоттенхэм» сафига энди қўшилган пайт Дайер жамоада эди, аммо ҳали кўп вақт ўтказган эмасди. Хуллас, иккимиз ҳам клубда янги футболчи саналганимиз учунми, тезда ўзаро тил топишганмиз.
- Сизнингча, тарихдаги энг яхши инглиз футболчиси ким?
- Стивен Жеррард — менинг кумирим.
- Евро-2016даги илк ғалабани қандай қабул қилдингиз? Жамоа-чи?
- Европа чемпионати иштирокчилари қаторига қўшилганимдан чексиз хурсандман, зеро, бу мен учун биринчи йирик турнирдир. Ўз ўрнида, англиялик мухлисларга раҳмат айтишим керак. Уларга гап йўқ - жамоамизга ақл бовар қилмас даражада илҳом бағишлаяптилар.
- Россия термаси билан ўйинда Эрик Дайер жарима зарбасини голга айлантирди. Қизиқ, сиз ҳам шундай гол ура олармидингиз?
- Ҳе, унга шунчаки, омад кулиб боқди (кулади). Йўқ, ҳазил. Аслида Эрик доимий тарзда бундай зарбалар устида қаттиқ ишлайди.
-Болалар учун кумирга айланиб улгурдингиз. Бу хусусда нима дея оласиз?
- Йигитлар баъзан бирга суратга тушишни илтимос қилишади ёки дастхат сўрашади. Бироқ очиғи, ҳозирча буни миямга сиғдиролмаяпман.
- Терма жамоадаги шерикларингиздан қандайдир янги ҳаракатларни ҳам ўрганяпсизми?
- Билмадим, мухлислар кўришдими-йўқ, Эрик яқинда интернетга ажойиб бир видеоёзув жойлаштирди - «югураётган одам» саҳнасини. Унда Жон Стоунс билан ҳаракатлари акс этган. Ўша кадрларни мен ёзиб олгандим, чунки бунақаси қўлимдан келмайди. Демак, улардан ўрганишим мумкин.
- Тасаввур қилинг, сизни кимсасиз оролга бадарға қилишди ва атиги 3та нарса олиб кетишингизга рухсат беришди. Бундай ҳолда нималарни танлардингиз ва нега?
- Қийин савол бўлди-ку. Албатта, футбол тўпи олишни унутмасдим - оролда зерикиб қолмаслик учун. Яна эҳтимол, попкорн оларман, бироқ фақат донини. Уларни орол қуёши остига қўйсангиз, бас. Ҳа, энди сув олишим табиий - чанқоқлик ёмон ахир...
- Агар Эрик Дайер ҳаёти ҳақида фильм суратга олинадиган бўлса, унинг роли учун қайси актёрни тавсия этардингиз?
- Очиғи, актёрларни унча яхши танимайман. Лекин танлаш имкониятини менга беришса, Жон Хиллни чақирардим. У ҳам жингалаксоч ва ҳазилкаш, айнан Эрикни эсга солади. Қолаверса, улар гавда тузилиши бўйича ҳам деярли бир хил.
- Шахсий фаолиятингиздаги энг ёқимли лаҳзалар...
- ...Тўғриси, 2та вазиятдан бирини танлашим жуда қийин. Биринчиси - «Лестер»га қарши ўйинда «Тоттенхэм» футболкасида урган илк голим ва иккинчиси - Франция термаси дарвозасини ишғол қилганим. Ҳм..., иккинчиси биринчисига нисбатан яхшироқ кўриняпти, барибир.
- FIFA виртуал ўйинида «ўзингиз»ни ўйнатиб кўрдингизми?
- 1-2 марта, бироқ виртуал нусхам ҳозирча унчалик кучли эмас. Умид қиламанки, ўйин ижодкорлари келаси йилгача «Деле Алли» устида кўпроқ ишлашади ва балки шундан сўнг яна ўйнаб кўрарман.
Football.ua - А. ҚОДИРОВ тайёрлади
