Португалия терма жамоаси бош мураббийи бугун бўлиб ўтадиган Польшага қарши ўйин олдидан ўз фикрларини билдириб ўтди. У Криштиану Роналду ҳақида саволларга алоҳида тўхталиб ўтди.

«Барча Роналду ҳақида гапирмоқда. Биласизми, нима учун? Сабаби, у ажойиб ўйинчи. Фақат буюк футболчилар ҳақида тинимсиз гапиришади. Европа чемпионатида юзлаб футболчилар бор. Уларни ҳар куни муҳокама қилишадими? Йўқ. Криштиану эса ҳаммага керак. Бу ҳолат Роналдуга босим ўтказмайди. У босимга дош бера олади ва керак пайтда юқори даражада кўрсата олади».

«Криштиануга майдонда тўла эркинлик берилади. Албатта, эртага у дарвоза томон 15 марта зарба бериб, 10та гол уришини истардим. Лекин, табиийки, Польша Роналдунинг бунча ҳужум қилишига имкон бермайди. Аммо у қийин вазиятлардан чиқиб кетишни билади», - дейди Сантуш.