"Машъал" - "Насаф" (1:0) ўйинидан кейинги матбуот анжуманининг иккинчи қисмида “Машъал” жамоаси бош мураббийи Александр ХОМЯКОВ ОАВ ходимлари саволларига жавоб қайтарди.

"Ғалабадан хурсандман. Биз учун жон куйдирган мухлисларни табриклайман. Футболчиларимга ҳам раҳмат. Қўлларидан келган барча ишни қилишди ва ғалабага эришишди. Қўзибоев? Уни ўйин тактикасидан келиб чиқиб захирада қолдирган эдик. Мавсумни жуда ёмон бошлаганимизга қарамай, охирги уч турда ғалабага эришиб, мавқеимизни яхшилаб олдик. Болалар охирги турларга келиб “уйғонишди”. Ботир Носиров захирада қолаяпти? Жавоҳир Илёсов ҳозир яхши ўйин кўрсатаяпти ва бизни кўп ҳолларда қутқармоқда. 

Умуман “Насаф”ни яхши ўргангандик. Жамоа таркибида жароҳатлар борлигини билардик. Лекин асосий таркибнинг бу қадар катта қисми ўйнамаслигини билмасдик. Очиғ айтаман: рақиб таркибида етакчиларнинг йўқлиги бизнинг вазифамизни осонлаштирди. Шунга қарамай бизга осон бўлмаслигини билардик. Амалда шундай бўлди ҳам. Биринчи бўлимда кўплаб имкониятларга эга бўлгандик. Иккинчи бўлимда рақиб ҳужум қилишини билардик. Шу боис асосан қарши ҳужумда ҳаракат қилдик" - деди Хомяков.