Парагвайнинг «Серро Портеньо» клубининг 18 ёшли ҳужумкор ярим ҳимоячиси Серхио Диас «Реал Мадрид»га ўтиши билан боғлиқ таассуротлари билан ўртоқлашди.
«Мен жамоага ёрдам бериш ва ўз иқтидоримни намойиш этиш учун жаҳоннинг энг кучли клубига ўтяпман. Ўзимни яхши томондан кўрсатиш учун қўлимдан келганини қиламан», — деди футболчи.
«Янги мавсумга «Реал»нинг биринчи жамоаси билан бирга тайёргарлик кўраманми-йўқми, ҳали билмайман. Ўйлашимча, яқин вақт ичида бу ҳақда менга маълумот беришади», — дея қўшимча қилди Серхио Диас.
Аввалроқ 18 ёшли футболчи дастлаб «Реал Мадрид»нинг фарм-клуби — «Кастилья» сафида тўп суриши ҳақида хабар берилган эди.
