Англия терма жамоасининг собиқ футболчиси Пол Гаскойн ичкиликбозлик ташхиси билан шифохонага ётқизилди. Бу ҳақда, Британиянинг Mirror нашрига таяниб, «ТАСС» хабар бермоқда.

Айтилишича, 49 ёшли Гаскойн шифохонага боши ёрилган, оёқяланг ҳолда етказилган.

Гаскойн алкоголизмдан азият чекаётгани кўпдан буён маълум. Хусусан, 2014 йил октябрида у Лондондаги клиникалардан бирида даволаниш курсидан ўтган эди. Бир йилдан сўнг у собиқ дугонаси Аманда Томасни таъқиб қилишда айбланди. 2015 йил декабрида тиббий муассасалардан бирининг ходимлари маст Гаскойнни қўли ярадор ҳолда топиб олди.

Гаскойн ўйинчилик фаолияти давомида Англиянинг «Ньюкасл», «Миддлсбро», «Эвертон», «Тоттенҳэм», Италиянинг «Лацио», Шотландиянинг «Рейнжерс» жамоалари таркибида тўп сурган. Шотландия жамоаси таркибида у икки карра мамлакат чемпиони, шунингдек, Миллий кубок ва Суперкубок соҳиби бўлган.

Гаскойн Англия футболи шон-шараф залига киради. Терма жамоа таркибида 57 ўйин ўтказган футболчи ўнта тўп муаллифига айланган. У фаолиятини 2004 йилда якунлаган.