Наманганда шахмат ва шашка бўйича “Биз ақл-идрокли оилалармиз” спорт мусобақасининг ҳудудий финал босқичи бўлиб ўтди.

Ватанимиз мустақиллигининг 25 йиллик байрамига бағишлаб “Маҳалла” хайрия жамоат фонди вилоят бўлими ва бошқа қатор ташкилотлар ҳамкорлигида ташкил этилган турнирда Президентимиз раҳнамолигида баркамол авлодни тарбиялаш, оилаларда маънавий-ижтимоий муҳитни янада яхшилаш, соғлом турмуш тарзи тамойилларини мустаҳкамлаш йўлида кенг кўламли ишлар амалга оширилаётгани таъкидланди.

Мусобақада вилоят шаҳар ва туманларидан ҳар бири олти иштирокчидан иборат 72 оилавий жамоа ўзаро баҳслашди.

Янгиқўрғон тумани Тошкент маҳалласидан Аҳмаджон Табаровлар оиласи биринчи ўринни қўлга киритди. Иккинчи ўринга Чуст тумани Меҳнатобод маҳалласидан Муҳаммаджон Алижонов оиласи сазовор бўлди. Мусобақада кучлари тенг келган Тўрақўрғон тумани Бекобод маҳалласидан Баҳром Аҳмедов ҳамда Поптумани Ултарма маҳалласидан Арслонбой Каттабобоев оиласи учинчи ўринга муносиб кўрилди.