Давралар оралиғидаги юзага келган қисқа таътилдан жамоамиз иккинчи даврага пухта тайёргарлик кўришга харакат қилмоқда.

Асосий таркиб аъзолари айни дамда Чирчиқ шаҳрида йиғин ўтказмоқда. “Кимёгар” стадиони яқинида жойлашган “Zerom” меҳмонхонаси “бургутлар”нинг вақтинчалик қароргоҳ вазифасини ўтаб бермоқда. Машғулотлар Ориф Маматказин бошчилигида ўтказилмоқда. Унга Виталий Легай билан Сервер Эсетов яқиндан ёрдам бермоқда. Кунига икки маҳалдан шуғулланаётганлигини ҳам қўшимча қилиш лозим. Жисмоний ва тактик йўналишлар бўйича машғулот ўтказилмоқда.

Эртага ушбу йиғин доирасидан ўрин олган илк синов-назорат учрашуви ўтказалади. “Бунёдкор” ёшлар жамоаси бу борада спарринг-рақиб вазифасини ўтаб беради.

Таркибдаги ўзгаришлар айни дамда мухлисларнинг диққат марказида турибди десак муболаға бўлмайди. Шу боис биринчи даврани жамоамизда ўтказган Нодир Ашурматов, Турсунбой Ҳусанов, Абдумалик Абдуллаев, Отабек Валижонов, Ғулом Ўрунов, Алишер Шоғуломов  каби ўйинчиларнинг жамоадан кетганлигини айтиш ўтиш жоиздир. Шунингдек тажрибали ҳужумчилар Неманья Йованович билан Анвар Бердиев ҳам айни дамда “Андижон” машғулотларида иштирок эта олмаяпти.

Таркибга эса “Навбаҳор”дан ҳимоячи Обид Жўрабоев билан ярим ҳимоячи Алибобо Раҳматуллаев келиб қўшилди. Шунингдек сўнгги пайтларда “Бухоро” учун ўйнаб келаётган Павел Смоляченко ҳам айни дамда “бургутлар”нинг ўқув-йиғин машғулотларида иштирок этмоқда. Биринчи даврани “Олмалиқ”да ўтказган марказий ярим ҳимоячи Дилшод Жўраев ҳам куни-кеча Чирчиқдаги йиғинга келиб қўшилди.

Улардан ташқари хорижлик футболчилар ҳам йиғинга таклиф этилган. Молдавиялик легионерлар кўрикдан муваффақиятли ўта олса, иккинчи даврани “Андижон”да ўтказади.

Айни дамда таркибни кучайтириш учун яна бир қатор футболчилар билан музокара олиб борилаётганини айтиб ўтиш лозим. Эслатиб ўтамиз, “Андижон”нинг Чирчиқдаги йиғини 25 июльга қадар давом этади.

Ёшлар жамоамиз ҳам Андижонда йиғин ўтказмоқда. Мураббий Ёдгор Хурхонов айрим сабабларга кўра, эндиликда жамоада ишламайдиган бўлди. Шу боис ҳозир машғулотлар Расул Раҳмонов бошчилигида ўтказилмоқда. Ўттиз нафар футболчи машғулотларда астойдил тер тўкмоқда. Табиийки таркибда янги ўйинчилар ҳам бор. Машғулотлар ҳозирча Олтинкўл туманидаги “Марказий” стадионда кунига бир маҳалдан ўтказилмоқда. Кейинги ҳафтадан бошлаб, футболчилар кунига икки маҳалдан шуғулланади. Ёшлар жамоамиз ҳам яқин орада назорат учрашувида майдонга тушишни режалаштирган.