Пойтахтимиздаги Республика олимпия захиралари теннис мактаби кортларида теннис бўйича Дэвис кубогининг Осиё-Океания минтақаси биринчи гуруҳ иккинчи босқич учрашувида Ўзбекистон терма жамоаси Хитой вакилларини 3-2 ҳисобида мағлубиятга учратиб, жаҳон лигасининг плей-офф баҳсида иштирок этиш ҳуқуқини қўлга киритди.    Биринчи кун бўлиб ўтган мусобақанинг яккаликлар ўртасидаги дастлабки кунги баҳсларида Денис Истомин Ди Вуни 6-4, 6-4, 6-2 ҳисобида мағлубиятга учратди. Иккинчи учрашувда Фаррух Дўстов Зе Жангга 6-1, 4-6, 4-6, 2-6 ҳисобида имкониятни бой берди.    Қоидага кўра мусобақанинг иккинчи куни жуфтликлар баҳси ўтказилди. Унда Денис Истомин ва Фаррух Дўстов жуфтлиги Чже Ли ҳамда Мао Хинг Гонг дуэтига қарши кортга чиқиб, тўрт сет якунига кўра 6-4, 3-6, 6-3, 6-4 ҳисобида ғалаба қозондилар.    Учинчи кун бўлиб ўтган баҳсларда Денис Истомин кутилмаганда Зе Жангга беш сет якунларига кўра имкониятни бой берди ва ўртадаги ҳисоб тенглашди – 2-2.Сўнгги ҳал қилувчи учрашувда Фаррух Дўстов Ди Вудан устун келди ва терма жамоамизга 3-2 ҳисобида ғалаба келтирди.