Мамлакатимизда ёшларни спортга кенг жалб этишга қаратилаётган алоҳида эътибор самарасида кўплаб спорт турлари қатори бадминтон ҳам жадал оммалашаётир.

Ўзбекистон Бадминтон федерацияси Самарқанд вилояти бўлими томонидан шаҳар ҳамда Пайариқ, Оқдарё, Пастдарғом, Жомбой ва Ургут туманларидаги болалар ва ўсмирлар спорт мактаблари қошида ташкил этилган тўгаракларда 500 дан зиёд ўғил-қиз маҳорат оширмоқда.

– Бадминтон навқирон авлоднинг соғлом улғайишида муҳим аҳамиятга эга, – дейди Самарқанд вилояти маданият ва спорт ишлари бошқармаси тасарруфидаги спорт ўйинлари ва енгил атлетикага ихтисослашган болалар ва ўсмирлар спорт мактаби мураббийи Зафар Ўтаев. – Ушбу спорт тури айниқса, кўзни равшанлаштириб, кўриш қобилиятини кучайтиради. Мактабимизда бадминтон билан шуғулланаётган 80 спортчининг 30 нафари қизлардир.