Олимпия ўйинларининг йўлланмалари учун ўтказилган лицензион мусобақаларда муваффақиятли иштирок этиб, тўлиқ таркиб билан Риога етиб келган бокс бўйича эркаклар терма жамоамиз спорт оламининг энг йирик мусобақасида ҳам зафарли одимлашда давом этишмоқда. Жумладан, энг енгил вазн тоифасида рингга кўтарилган Ҳасанбой Дўсматов (-49 кг) мексикалик Jozelito Velazuezга қарши кечган жангда рақибига ҳеч қандай имконият қолдирмади ва ҳакамлар ушбу жангда бир овоздан Ҳасанбойни ғалаба қозонганлигини эътироф этишди.
Энди Ҳасанбой 10 август куни ўтказиладиган чорак финалда қозоғистонлик Биржан Жакиповга қарши баҳс юритади. Агар ушбу жангда Ҳасанбойнинг қўли баланд келса, Олимпия ўйинларининг камида бронза медалини нақд қилиб қўяди. Бу йўлда ҳамюртимизга омад ва зафарлар тилаб қоламиз. Бугун рингга кўтарилган яна бир юртдошимиз Рустам Тўлаганов(-91 кг) ҳам эквадорлик Julio Cezar Castillo билан кечган жангда тўлиқ устунликка эришди ва 3:0 ҳисобида зафар қучиб, чорак финалга чиқди. Тажрибали боксчимиз 10 август куни ярим финал йўлланмаси учун кечадиган жангда озарбайжонлик Абдуқодир Абдуллаев билан куч синашади. Рустам Тўлагановга навбатдаги баҳсда ҳам ғалаба ёр бўлишлишгини тилаб қоламиз.
9 август куни чарм қўлқоп усталаримиздан Хуршид Тожибоев (-60 кг) рингга чиқади. Дастлабки босқичда қатарлик боксчини мағлуб этган Хуршидбек эндиликда чорак финал йўлланмаси учун британиялик Жозеф Кордина билан баҳс юритади. Эслатиб ўтамиз, бугунга қадар бўлиб ўтган жангларда рингга кўтарилган тўрт нафар боксчимиздан барчаси ғалаба қозониб, навбатдаги босқичга чиқдилар. Келгуси баҳсларда ҳам ўз олдига доимо юқори мақсадларни қўядиган чарм қўлқоп усталаримизга фақат ва фақат омад тилаб қоламиз.
