Рио-де-Жанейро шаҳрида Олимпиада ва Паралимпия ўйинлари давомида ночорлар кечки овқатни бепул тановул қила оладиган ресторан очилди. Бу ҳақда «Ведомости» хабар бермоқда.

Лойиҳа муаллифларининг ғоясига кўра, мазкур ресторан хайрия жамғармалари ва Олимпиада иштирокчилари учун харид қилинган ҳамда ортиб қолган озиқ-овқат маҳсулотлари эвазига таъминланади.

Маълум бўлишича, олимпия қишлоғидаги маҳсулотлар сифатсиз бўлгани учун эмас, ортиқча бўлгани сабабли йўқ қилинаётган экан.

«Таъминотчилар билан ортиқча маҳсулотларни ресторанимизга келтириш борасида келишиб олиш учун барча имкониятни ишга солдик. Заводлардан 120 та юк машинасида озиқ-овқат маҳсулотлари чиқиб кетиб, 20 таси қайтиб бориши ва улар йўқ қилинишини билганимиздан сўнг шундай фикрга келдик. Лойиҳанинг биринчи мақсади – исрофгарчиликка қарши кураш. Иккинчи мақсад очарчиликка қарши кураш, ахир биз одамларга яхши егулик беряпмиз», – деди лойиҳа муаллифларидан бири Давид Герц.

Сифатли овқат тайёрлаш учун бутун дунёдан 45 та катта ошпаз таклиф этилди. Олимпиячилардан ортиб қолган маҳсулотлар эвазига ҳар куни 108 кишини овқат билан таъминлаш имкони мавжуд. Бепул кечки овқатни фақатгина жамоат ташкилотларидан кам таъминланган сифатида ёрдам олувчи бразилияликларга берилади.