Андижонда ўтказилган “Футболимиз келажаги” мусобақаcининг ҳудудий финал босқичида 17 жамоа уч ёш тоифасида ғолиблик учун баҳслашди. 

Президентимиз раҳнамолигида ёш авлоднинг ҳар томонлама баркамол улғайиши, истеъдод ва салоҳиятини намоён этиши учун кенг имкониятлар яратиб берилмоқда. Хусусан, болалар спортини ривожлантириш йўлида амалга оширилаётган ишлар ёшларни оммавий спортга жалб этишда муҳим омил бўлаётир. "Соғлом она ва бола йили" Давлат дастури ижроси доирасида ташкил этилган мазкур мусобақа ҳам айни шу мақсадларга қаратилгани билан аҳамиятлидир. 

Вилоятдаги 868 маҳаллада ўтказилган мусобақада 55 мингдан зиёд болалар ва ўсмирлар иштирок этди. Унинг маҳаллалараро, туман ва шаҳар ҳамда минтақавий босқичларида 2500 дан зиёд жамоа ғолиблик учун баҳс олиб борди. 

Мусобақанинг 9-10 ёшлилар гуруҳида Пахтаобод туманининг Учкўза маҳалласи, 11-12 ёшлилар ўртасида Андижон шаҳридаги 8-маҳалла фуқаролар йиғини ва 13-14 ёшлилар ўртасида Марҳамат туманининг Бозорбоши маҳалласи жамоалари биринчи ўринни эгаллади. 

– Ҳар бир учрашув кескин курашларга бой бўлди, – дейди Марҳамат туманидаги Бозорбоши маҳалласи жамоаси аъзоси Баҳодир Собиржонов. – Маҳаллалараро ўтказилаётган бундай мусобақалар ёшларнинг спортга қизиқишини ошириш билан бирга, улар қалбида ватанпарварлик, дўстлик ва ҳамжиҳатлик фазилатларини юксалтириш, навқирон авлоднинг соғлом ва баркамол улғайишига хизмат қилади. 

Ғолиб ва совриндорлар ташкилотчилар томонидан рағбатлантирилди.