«Торино» бош мураббийи Синиша Михайлович «Милан»га қарши Италия «А» Серияси 1-тур учрашуви олдидан ўз фикрлари билан ўртоқлашди. 

Эслатиб ўтамиз, Синиша Михайлович ўтган мавсум маълум муддат «Милан»га устозлик қилган, бироқ бир қатор муваффақиятсиз натижалардан сўнг, истеъфога чиқарилган эди. 

«Сан-Сиро»да «Милан»га қарши ўйнаш ҳар доим оғир бўлган, бироқ биз у ерга ташаббусни қўлга олиш учун борамиз», — деди Синиша Михайлович. 

«Натижа борасида кафолат бера олмаймиз, бироқ бор кучимиз билан ҳаракат қилишимизга кафилман. Ўйинни илк дақиқаларданоқ яхши бошлаш муҳим аҳамиятга эга», — деди «Торино» устози. 

«Ким бўлишидан қатъий назар, бировдан қасд олиш ниятим йўқ. Албатта, «Милан» билан мавсум охиригача ишламаганимдан аччиғим чиққан, бироқ бугун барчани қувонч билан қаршилайман», — деди Михайлович.