«Палермо» президенти Маурицио Дзампарини янги футболчилар сотиб олиш зарурлиги ҳақида фикр билдирган жамоа бош мураббийи Давиде Баллардинини танқид қилди. 

«Бир кун келиб, Баллардини нима учун бундай гапларни гапираётганини тушуниб етармиз. Унда ҳозир янги асосий дарвозабон бор. Биз бешта футболчи ва учта ёш ўйинчи сотиб олдик. Мен ишонч ва иштиёқни кўришни истайман, талаб ва илтимосларни эмас», — деди клуб президенти. 

«Мен жамоага бир қатор иқтидорларни олиб келдим, уларни қўлга киритиш йўлида рақибларни доғда қолдирдим. Мен ишончни талаб қиламан, норозиликни эмас! Мураббий ўз ишини қилиши керак, трансферлар эса — бизнинг ишимиз. У машғулотлар ва тактика ҳақида гапириши лозим, қолганини эса менга айтсин, матбуотга эмас», — деди Дзампарини. 

«У овозини ўчиришни ва яхши мураббийлигини исботлаш йўлида майдонда ишлашни ўрганиб олса, ёмон бўлмайди», — дея қўшимча қилди «Палермо» президенти.