«Интер» бош мураббийи Франк де Бур Италия «А» Серияси 1-тури доирасидаги «Кьево»га қарши ўйин олдидан ўз фикрларини билдириб ўтди.
«Чемпионат стартини катта иштиёқ билан кутяпман. Ҳар ким мана шундай жиддий мусобақада ростмана қатнашгиси келади. Ҳозирча жамоа билан атиги битта ўртоқлик учрашуви ўтказдик, бу кам, албатта. Бироқ биз биринчи ўйинга тайёрмиз, бунга ишончим комил», — деди голландиялик мутахассис.
«Мен ташвишга тушаётганим йўқ. Шубҳасиз, жамоа билан яқиндан танишиш ва унга янги тактик услубларни олиб кириш учун кўпроқ вақтга эга бўлсам, зарар қилмасди. Бироқ ўтган ҳафта кўрдимки, футболчилар айнан мен маъқул кўрадиган тактикага ҳозирданоқ мослаша бошлашган», — деди Франк де Бур.
«Биз ўйинларда ташаббусни қўлга олишни, имкон қадар кўпроқ қулай вазиятларни юзага келтиришни истамоқдамиз. Бу айнан мен кўришни хоҳлаётган жиҳат. Бу бутунлай бошқа футбол фалсафаси, бироқ футболчилар уни қабул қила олишади, деб ўйлайман», — деди «Интер»нинг янги бош мураббийи.
