Ўзбекистон ва Буркина Фасо (1:0) миллий терма жамоалари ўртасидаги ўртоқлик учрашувидан сўнг матбуот анжумани бўлиб ўтди ва унда дастлаб меҳмонлар мураббийи Маудрисса Траоре саволларга жавоб берди.

“Биз бугунги ўйин натижасидан эмас, аммо ўйиннинг қай тарзда кечганидан қониқиш ҳосил қилдик. Ўйин давомида бир қанча яхши вазиятлар ярата олдик. Умуман олганда, шогирдларимнинг ўйини менга маъқул бўлди. Ҳар бир ўйиндан биз нимадир ўрганамиз ва бугунги ўйин ҳам истисно бўлмади.

Биз учрашув ташкилотчиларига, Ўзбекистон Футбол Федерациясига, унинг барча ҳодимларига миннатдорчилик билдираман. Бизни бу ерда жуда яхши кутиб олишди. Футбол – дипломатия. Биз бу ерга келишимизни билганимизда, интернет орқали мамлакат ҳақида кўп ўқидик, кўп маълумотлар олдик. Бу ерга келганимиздан кейин эса бунгача ўрганганларимиздан кўра кўпроқ нарса ўргандик. Бу амалий ташриф, бизга худди таътилдек туюлди. Умид қиламанки, Ўзбекистон терма жамоаси энди Буркина-Фасога ташриф буюради ва алоқаларимиз янада мустаҳкамланади”, - дея мураббий ўз фикрларини билдирди.