1news.uz — Ўзбекистон Президенти Ислом Каримов фармонига кўра Ватанимиз мустақиллигини мустаҳкамлаш, миллий ғояни ривожлантириш, маънавиятимизни тиклаш, ўзлигимизни англаш йўлида катта ҳисса қўшган, ёрқин истеъдоди ва ижоди, илмий фаолияти, ҳалол хизмати, ёшларни она юртга муҳаббат, истиқлол ғояларига садоқат руҳида соғлом ва баркамол этиб тарбиялаш ҳамда жамоат ишларидаги фаол иштироки учун Ўзбекистон футбол федерациясининг мухлислар жамияти раиси Абдураҳмон Фозиловга “Ўзбекистон Республикасида хизмат кўрсатган ёшлар мураббийи” фахрий унвони берилди.
Ўзбекистон мухлислар клуби 2007 йилда ЎФФ президенти Мираброр Усмоновнинг ташаббуси ва таклифи билан ташкил этилган. Абдураҳмон Фозилов 2007 йилда Ўзбекистон футбол мухлислари клуби раиси ўринбосари этиб тайинланади. 2008 йилдан бери ушбу клубга раислик қилиб келади. Клуб ташкил этилишидан кўзланган асосий мақсад – бутун ўзбек футболи мухлисларини бирлаштириш ва шу билан биргаликда мухлислик маданиятини йўлга қўйиш, стадионларда учраб турадиган, миллатимизга хос бўлмаган кўнгилсиз ҳолатлар, ҳакамлар ва футболчиларга нисбатан айтиладиган ножўя гап-сўзлар, хайқириқларни бартараф этишдан иборат. Ўзбекистон футбол мухлислари клубининг ички низомига кўра, клуб аъзоси рақиб жамоа футболчилари, мураббийлари ва ишқибозларини, учрашув ҳакамларини ҳақорат қилмаслиги, стадионга спиртли ичимликлар олиб кирмаслиги ва истеъмол қилиб қилмаслиги, мухлислар клуби билан келишмаган ҳолда бирор баннер ёки плакатларни кўтармаслиги керак. Хорижий мамлакатлардаги сафар учрашувлари чоғида эса ўша давлат қонун-қоидалари ва тартиб-интизомга тўлиқ риоя қилиш шарт.
