Яқинда роса асабийлашдим. Нега дейсизми? Чунки Ўзбекистон миллий терма жамоаси ўртоқлик ўйини ўтказиш учун нақ Африканинг нақ бир чеккасидаги Буркина-Фасо деган терма жамоасини танлади. “Қойил-э, — дедим ўзимга ўзим, — бошқа жамоалар қуриб қолибдими?” Мен қатори кўпчилик Буркина-Фасо термасини писанд этмаганлиги тайин. Бироқ “Пахтакор” стадионида бўлиб ўтган ўйиндан кейин амин бўлдимки...
РОССИЯ ЙЎЛИДАГИ ТУТУНЛАР
Шунга амин бўлдимки, терма жамоамизни Россиядаги мундиалга олиб борувчи йўл тутун остида қолганга ўхшамоқда. Ўн қадам нарини кўра олмаётганга ўхшаймиз. Нега дейсизми? Бунинг бир қанча сабаблари бор. Олдиндан огоҳлантириб қўяй, агар “Бунйодкор” стадионида Сурия термасини тор-мор этсак, фахрланаман, чин дилдан қувонаман, чунки терма жамоамизнинг ашаддий мухлисиман. Шу билан бирга хотиржам ҳам бўла олмайман, сабаби терма жамоамизнинг ашаддий мухлисиман. Аслида, Сурия бизнинг мақсадимиз йўлида чивиндек тўсиқ, холос. Йўлимизда даҳшатли-даҳшатли аждаҳолар бор.
БИРИНЧИ ТУТУН — ЖАНУБИЙ КОРEЯ
Жанубий Корея терма жамоасини эслаганимда тепа сочим тикка бўлади. Айниқса, ғалаба қозониш учун биз ўзбеклар ҳеч қачон қўл урмайдиган усулларни қўллашга ҳам тайёр бўлган, Эрон терма жамоаси устози билан ўзига хос спектал қўйган лаънати бош мураббийни бир нималар қилиб қўйгим келади. Ахир футбол эркаклар ўйини-ку, тўғрими? Аммо Самвел Бабаян мавжуд футболчилардан фойдаланиб, шундай тактика тузиши керакки, кореяликлар учун сичқоннинг ини минг танга бўлиб қолсин. Бунинг учун футболчиларимиз Жанубий Корея деганда уйғонадиган тасаввурни Яман деганда уйғонадиган тасаввур билан алмаштиришлари керак. Чунки ишонинг, ҳозир Жанубий Корея биз учун Ямандек гап, ҳатто ундан ҳам кучсиз. Ҳа, жаноб Бабаян, ишонаверинг, агар сиз тактика ва таркибни тўғри танлай олсангиз, қалбингизга эмас, ақлингизга қулоқ тутсангиз, Жанубий Корея термасини пашшадек эзғилаб кетамиз. Ахир Россияни титратиб юрган Одил ва Виталийдек, Осиё футболининг келажаги бўлмиш Сардордек футболчиси бор терма жамоанинг Жанубий Кореядек термачага ютқазиши филнинг сичқонга мағлуб бўлиши билан тенг-ку, тўғри! Келинг, жаноб Бабаян, шу корейсларга чиқиш эшигини кўрсатиб қўйинг, шунда жуда савобли иш қилган бўласиз.
ИККИНЧИ ТУТУН — ЭРОН
Карлос Кейрушнинг башараси ҳам корейслар устозиники каби хунук таассурот қолдирган бизда. Биз ишонамиз, бу сафар ҳам Эрон бош мураббийси нимадир ўйлаб топишга интилади. Лекин Эронни мағлуб этиш ҳам қийин эмас. Бу терма жамоа бизнинг термамиз олдида жа Яман эмас-у, Гонконгдек бор. Биз бу терма жамоаларни ерга урмоқчи эмасмиз, аксинча, ўзбек футболига муносиб баҳо бермоқчимиз, холос. Келинг, жаноб Бабаян, сизга бир сирни айтай, эронликларни енгиш учун эронликлардек ўйнаш керак, яъни жуда тезкор ҳаракат қилиш лозим. Олдинга ва орқага. Яна бир гап, тўпни қанотдан олиб бориб, кейин майдон марказига узатаверишга асосланган кийилган кавуш каби эскириб кетган тактикадан воз кечинг! Ташвишланманг, эронликлар ҳам одам. Сиз қанотларга ва марказга тезкор, ҳужумга аниқ ҳаракат қилувчи ва тезкор қарор чиқарувчи, ҳимояга эса тартибли ҳаракат қилувчи футболчиларни жойлаштиринг. Ўшанда кўрамиз эронликлар нима қила олишаркин? Сизда вариантлар кўп, фақат улардан қандай фойдаланишни билсангиз, олам гулистон.
УЧИНЧИ ТУТУН — ЎЗИМИЗ
Ҳа, жаноб Бабаян, ажабланманг, учинчи тутун ўзимиз ҳисобланамиз. Яъни терма жамоадаги ўзаро муаммоларни ҳал қилиш ҳам кўп нарсага имкон яратади. Жаноб Бабаян, ҳали сиз жиддий рақибларга дуч келмадингиз? Хафа бўлманг-у, шунинг учун ҳозирча сизга юқори баҳо беролмаймиз. Аммо бир нарсани аниқ биламиз, сиз терма жамоага шунчаки бақириб вақт ўтказиш учун келмагансиз, сиз ғурурли одамсиз, “Самвел Бабаян дегани келиб, ҳеч нарсага эришолмади, Ўзбекистон терма жамоаси яна шармандаларча мағлуб бўлди”, деган иснодни кўтара олмаймиз, тўғрими? Унда оддий жиҳатларга ҳам эътибор беринг, бирор-бир ўзгартириш қилишдан олдин яхшилаб ўйланг. Дарвоза чизиғи сергак ва совуққон, вазиятни олдиндан ўқий оладиган посбонни жойлаштиринг (Лобанов шу талабларга жавоб бериши ёки бермаслигини ўйлаб кўринг, агар жавоб беради, деб ўйласангиз ва бу ишончингиз ўзини оқласа, майли, акс ҳолда...). Ўйлашимча, ҳимоя ва ярим ҳимояда муаммолар йўқ. Ҳужум чизиғи эса алоҳида муаммо. Шахсан мен законний ҳужумчини кўрмаяпман, жаноб Бабаян. Сиздан илтимос, хурмача қилиқлари билан асабларимизга ўйнамайдиган, аниқ ва кучли зарба йўллай оладиган, кутилмаган қарорлари билан рақибларни шошириб қўядиган ҳужумчи топинг (Сергеев шундай талабларга жавоб бера оладими, деган саволни эса алоҳида ўйлаб кўринг). Хуллас, жаноб Бабаян, биз сизга ишонамиз, аниқроғи, бутун Ўзбекистон халқи сизга ишонади. Терма жамоанинг жилови қўлингизда эканлиги бежиз эмаслигини исботланг. Ишонинг, агар Россияда бўлиб ўтадиган жаҳон чемпионлиги учун кураш олиб борадиган термалар жойлашган гуруҳлардан бирида “Ўзбекистон терма жамоаси” деган жумла ёзилса, ўзбек футболи сизни ҳеч қачон унутмайди. Агар акси бўлса, акс ҳолда... Келинг, бундай бўлишига йўл қўймайлик. Хуллас, ҳеч қачон ортга чекинманг, Самвел Бабаян!
Илҳом
