УЕФА томонидан ташкил қилинган Европанинг энг сара мураббийлари анжуманида футболдаги қўшимча вақт ҳақида мунозара бўлиб ўтди.

Sky Sports хабарига кўра, 14 мураббийнинг 8 нафари 15 дақиқалик иккита таймни бекор қилиб, пенальтилар сериясини дарҳол бошлаб юбориш учун овоз беришган.

УЕФА мураббийлари элчиси Алекс Фергюсон қўшимча вақт белгиланганда, оёғини зўрға судраб юраётган футболчиларни кўриш ҳеч кимга ёқмаса керак деган фикрда. Бошқа мураббийлар эса қўшимча вақтларни бекор қилиниши кучсиз жамоаларга қўл келишини, улар пенальтилар сериясигача етиб бориш учун ҳимояга ётиб олишлари мумкинлигини айтишган.

УЕФА ташкилоти бу борадаги мунозараларни давом эттирмоқчи.

Анжуманда Алекс Фергюсон, «Бавария» бош мураббийи Карло Анчелотти, Рафаэль Бенитес ("Ньюкасл", Англия), Жозе Моуриньо ("Манчестер Юнайтед", Англия), Арсен Венгер ("Арсенал", Англия), Унаи Эмери (ПСЖ, Франция), Луис Энрике ("Барселона", Испания), Дитер Хеккинг ("Вольфсбург", Германия), Зайниддин Зидан ("Реал", Испания), Руй Витория ("Бенфика", Португалия), Массимилиано Аллегри ("Ювентус", Италия), Хейн Ванхазебрук ("Гент", Бельгия), Сергей Ребров ("Динамо", Украина) ва Мирча Луческу («Зенит», Россия) иштирок этди.