"Камолот" ЁИҲнинг "Kamolot-TUR” веломарафони ёшлар орасида кенг оммалашган ва улар томонидан интиқлик билан кутиб олинадиган мега-лойиҳа ҳисобланади. Ҳаракат томонидан 2008 йилдан буён велоспорт тури бўйича анъанавий тарзда ўтказилаётган "Kamolot-TUR” веломарафони ёшларнинг спортга, хусусан, велоспортга қизиқишларини ошириш, уларни жисмонан соғлом, руҳан тетик қилиб тарбиялашда муҳим омил бўлиб хизмат қилмоқда. Аҳамиятлиси, мазкур веломарафонда мамлакатимизнинг ҳар бир йигит-қизи ихтиёрий тарзда иштирок этиши мумкин.
Ёшлар ўртасида соғлом турмуш тарзини тарғиб қилиш, спортнинг оммавий турларига ёшларни кенг жалб этиш орқали уларни жисмонан баркамол қилиб тарбиялаш мақсадида Мустақиллигимизнинг 25 йиллиги муносабати билан “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида ташкил этилган “Камолот-Тур” IX ёшлар веломарафонининг туман, шаҳар босқичларида 1350 нафарга яқин ёшлар иштирок этиб, вилоят босқичига 290 нафар ёшлар йўлланма олишган эди.
Веломарофончилар 20 километрли масофани босиб ўтиб, Қарши шаҳридаги Мустақиллик майдонига кириб келишди. Веломарафонда ғолибликни қўлга киритган ёшлар 3 ёш тоифаси (9-14, 15-17, 18-30) бўйича диплом ва қимматбаҳо совғалар билан тақдирландилар ҳамда веломарафоннинг Республика босқичида қатнашиш ҳуқуқини қўлга киритишди.
