"Барселона" Испания чемпионатида "Алавес"дан қабул қилган мағлубият аламини "Селтик"дан олди. Каталонияликлар Европа чемпионлар лигасининг янги мавсуми йирик ҳисобдаги ғалаба билан бошлашди.
Учрашувнинг 3-дақиқасидаёқ Неймарнинг узатмасидан кейин Лионель Месси ҳисобни очишга муваффақ бўлди. Бу аргентиналик футболчининг ЕЧЛдаги энг тезкор голи бўлди. Шотландияликлар 24-дақиқада ҳисобни тенглаштиришлари мумкин эди, аммо Мусса Дембеленинг пенальтидан берган зарбасини Тер Штеген қайтаришга муваффақ бўлди.
Танаффусга қадар Неймар-Месси жуфтлиги "Селтик"нинг мудофаасини "девор" ўйнаб ёриб ўтди ва Лео ҳисобни 2:0га етказди.
Иккинчи бўлимда "кўк-анорранглилар" меҳмонларни бутунлай тор-мор келтиришди. Месси "хет-трик"ни расмийлаштирган бўлса, Неймар ўз ҳисобига битта гол ёзди ва 4та голга ассистентлик қилди. Ўйин давомида Луис Суарес ўз ҳисобига иккита гол ёзган бўлса, Иньеста бир марта "Селтик" дарвозасини ишғол қилди. Якуний ҳисоб — 7:0!
ЕЧЛ, "С" гуруҳи
"БАРСЕЛОНА" - "СЕЛТИК" - 7:0 (2:0)
Голлар: 1:0 – 3 Месси, 2:0 – 27 Месси, 3:0 – 50 Неймар, 4:0 – 59 Иньеста, 5:0 – 60 Месси, 6:0 – 75 Суарес, 7:0 – 88 Суарес.
Ноаниқ пенальти: Мусса Дембеле (24, дарвозабон)
Барселона – тер Штеген, Умтити, Пике, Альба, Сержи Роберто, Ракитич (Иньеста, 46), Бускетс (Рафинья, 61), Андре Гомеш, Неймар, Месси, Суарес.
Селтик – де Врис, Святченко (О’Коннелл, 68), Туре, Тирни, Гамбоа, Браун, Битон (Макгрегор, 76), Синклэйр, Робертс (Армстронг, 68), Люстиг, Дембеле.
Огоҳлантиришлар: тер Штеген (23), Ракитич (40), Браун (56).
Ушбу гуруҳнинг "МАНЧЕСТЕР СИТИ" - "БОРУССИЯ" Мёнхенгладбах ўйини кучли ёмғир туфайли ўтказилмай қолди.
