«Бавария» жамоаси сардори Филипп Ламга кўра, келгуси йилларда жамоа раҳбарияти олдида катта вазифалар турибди. Хаби Алонсо (34 ёшда, шартномаси 2017 йилгача), Ариен Роббен (32 ёшда, шартномаси 2017 йилгача), Франк Рибери (33 ёшда, шартномаси 2017 йилгача) ва Ламнинг ўзи ҳам (32 ёшда, шартномаси 2018 йилгача) мюнхенликлар таркибидаги асосий ва шу билан бир қаторда ёши катта футболчилардан саналишади. Германиянинг рекордчи жамоаси эса яқин келажакда ушбу футболчиларга муносиб ўринбосарлар топиши керак бўлади.
«Худди шундай, бу бор гап: жамоани авлодлар алмашинуви кутмоқда. Номи тилга олинган футболчилар билан жамоа ўтган йилларда катта ютуқларга эришди, биз «Бавария»нинг юзига айландик», дейди Лам «Sport Bild» нашрига берган интервьюсида. «Бастиан Швайнштайгер кетиб бўлди, Ариен, Франк, Хаби ва мен ёшариб қолмаймиз.»
Ламга кўра, жамоанинг ҳозирданоқ бу борада бош қотириши жуда муҳимдир: «Агар бу ўйинчилар тўсатдан футбол ўйнашни тугатиб, кетадиган бўлишса, нима бўлади? Бунга ечим топиш катта вазифа ҳисобланади.»
Филипп Ламнинг ўзи жорий шартномаси тугаши билан футболчилик фаолиятига якун ясамоқчи эканлигини маълум қилганди. 32 ёшли бу футболчи айни вақтда Мюнхенда Маттиас Заммер ишдан кетганидан бери бўш қолаётган спорт ишлари бўйича директорлик лавозимига муносиб кўрилмоқда. Бу борада Лам шундай дейди: «Айтишим мумкинки, жамоа менинг юрагимдан жой олган. Мен «Бавария»да қолишни бажонидил истайман ва клуб раҳбарияти билан муносабатларим ҳам аъло даражада.» Демак, Ламнинг яқин келажакда ушбу раҳбариятга яқин жойда фаолият юритишига шубҳа йўқ.
