Олий лигада 22-тур учрашувлари ўз якунига етди. "Локомотив" сафарда "Олмалиқ"ни 5:2 ҳисобида мағлуб этиб қайтди. Мазкур учрашувда "Локомотив"нинг ҳужумкор ярим ҳимоячиси Сардор Мирзаев иккита гол уриб дубл қайд этди.
Натижада Сардорнинг ушбу мавсум олий лигада урган голлари сони 10тага етди. Ҳозирда "темирйўлчилар" ҳужумчиси Темурхўжа Абдухолиқов 16та гол билан тўпурарлар пойгасида биринчи ўринда бормоқда.
"Локо" футболчилари биринчи давранинг 15 ўйинида 36 бор рақиблар дарвозасини ишғол қилишганди. Иккинчи даврада ҳозирча олтита ўйин ўтказган "Локомотив" 21та тўп киритишнинг уддасидан чиқди.
Иккинчи давра старт олганидан бери Абдухолиқов 5 марта тўп киритган бўлса, Бикмаев ва Мирзаев тўрттадан, Жепаров эса учта гол урди. Шунингдек, Шоаҳмедов ўз ҳисобига иккита, Геворкян билан Зотеев биттадан гол ёзиб қўйишди. Эслатиб ўтамиз. "Локомотив" ўзининг навбатдаги учрашувини 23 сентябрь куни "Обод"га қарши ўтказади.
