«Арсенал» бош мураббийи Арсен Венгер қўл остидаги жамоанинг собиқ ҳужумчиси — Никлас Бендтнер ҳақида фикр билдирди.
«Арсенал» 20 сентябрь куни Англия Лига Кубоги доирасида «Ноттингем Форест»га қарши майдонга тушади, Бендтнер эса ҳозирда айнан «Ноттингем Форест» аъзоси ҳисобланади.
«Бендтнернинг «Ноттингем» билан шартнома имзолагани мен учун кутилмаган янгилик бўлди. Бироқ қайсидир маънода Никлас ўз фаолиятини қайта йўлга қўйиши керак. Ҳар қандай шароитга мослашишни ўрганиш керак. Ҳар турли даражада ўйнай олишинг ва фойданг тегишини кўрсата билиш керак. Баъзида Никлас даражасидаги ўйинчиларга имкон бериш керак. Биз унинг кучли томонларидан бохабармиз, у жуда малакали футболчи, унга шунчаки ўйин амалиёти керак», — деди Венгер.
«Кўпчилик Бендтнерни ҳаддан ташқари ўзига бино қўйган, деб ҳисоблайди, аслида ундай эмас. Ҳа, «Арсенал»да ўйнаган вақтлари баъзида сабрсизлик қиларди. Бироқ у шунчаки ўзига имконият берилмаганидан хафсаласи пир бўларди, холос. Уни тушуниш мумкин», — дея қўшимча қилди «Арсенал» бош мураббийи Арсен Венгер.
