Бугун Наманганда 2005 йилда туғилган болалар ўртасида Ўзбекистон чемпионати старт олди. Мазкур чемпионатда тўққизта вилоят вакиллари бош соврин учун курашга киришдилар.
Вилоятимиз терма жамоаси мезбонлик қилаётган Мусобақада қатнашиш мақсадида 26 сентябрь куни Наманганга Жиззах, Бухоро, Хоразм, Андижон, Навоий, Фарғона, Тошкент вилояти ва Тошкент шаҳри терма жамоалари етиб келишди. Кеча бўлиб ўтган қуръа ташлаш маросимида қатнашчилар учта гуруҳга бўлинишди. Унга кўра “А” гуруҳидан Жиззах, Тошкент ва Андижон вилояти терма жамоалари, “В” гуруҳидан Бухоро, Наманган ва Навоий вилояти термалари жой олишди. “С” гуруҳини эса Хоразм, Фарғона вилояти ва Тошкент шаҳри терма жамоалари ташкил этиб беришди. Гуруҳларда ғолибликни қўлга киритган жамоалар ва энг яхши кўрсаткичга эга иккинчи ўрин соҳиблари ярим финал йўлланмасини қўлга киритишади. Шу ўринда учрашувларнинг ҳар бир бўлимини 25 дақиқадан иборат эканлигини ва дарвозалар ўлчамини 5х2 хажмда эканлигини ҳам қўшимча қилиш жоиз.
