Шотландиялик боксчи Майк Тоуэллнинг ўлимидан олдин уни нокаутга учратган Дэйл Эванс бўлиб ўтган воқеа учун жавобгарликни ҳис қилаётганини маълум қилди. Бу ҳақда «ТАСС» хабар бермоқда.

29 сентябрь куни Дэйл Эванс Майк Тоуэллга қарши жангнинг бешинчи раундида уни нокаутга учратди. Оғир зарбалар қабул қилган Тоуэлл замбилда олиб чиқилди ва шифохонага етказилди. Бироз вақт ўтиб, 25 ёшли боксчи бош мия жароҳатлари оқибатида вафот этди.

«Бўлиб ўтган воқеа учун жавобгарликни ҳис қиляпман, чунки биз бир-биримизни урамиз. Умрим давомида ушбу даҳшатли ҳиссиёт билан яшашга мажбурман. Ҳозир уни бу ҳаётда бошқа кўра олмайдиган икки яшар ўғли, унинг севган қизи ва оиласи ҳақида ўйлаяпман», – деди Эванс.

Дэйл Эванс, шунингдек, фаолиятини якунлаб, боксдан кетиш ҳақида ўйлаганини маълум қилди. Энди эса у Тоуэллнинг хотирасига бағишлаб Буюк Британия чемпиони бўлмоқчи.

Майк Тоуэллнинг ўлимидан сўнг британиялик депутат бокс қоидалари ўзгартирилишини талаб қилди. Қатор ташкилотлар эса боксни умуман бекор қилиш таклифини билдирди.