Тошкентда дзюдо бўйича Гран-при туркумига кирувчи халқаро турнир бошланди, деб хабар беради ЎзА.
Маданият ва спорт ишлари вазирлиги, Миллий олимпия қўмитаси, Ўзбекистон дзюдо федерацияси, Халқаро дзюдо федерацияси (IJF), қатор вазирлик ва ташкилотлар билан ҳамкорликда тўртинчи бор ташкил этилаётган мусобақада дунёнинг йигирмага яқин давлатидан 135 спортчи ўн тўрт вазн тоифасида совринли ўринлар учун курашмоқда.
Халқаро дзюдо федерацияси 2013–2016 йилларда Гран-при туркумига кирувчи турнирларни Тошкент шаҳрида ўтказишга қарор қилган. Ўзбекистон дзюдо федерацияси томонидан бу йилги Гран-при турнирини ҳам юқори савияда ўтказиш, мусобақа ташкил этиладиган жойнинг халқаро стандартларга мос жиҳозланишини таъминлаш бўйича изчил ишлар олиб борилди, дейилади хабарномада.
«Ўзбекистон» спорт мажмуасида 6 октябрь куни нуфузли мусобақанинг очилиш маросими бўлди.
«Ўзбекистонда спортни ривожлантириш бўйича амалга оширилаётган кенг кўламли ислоҳотлар ўзининг юксак самараларини бермоқда, — деди Осиё дзюдо уюшмаси раиси Обейд Ал-Анзий. — Бу мамлакатингизда нуфузли спорт анжуманларининг мунтазам ўтказилаётгани, ўзбекистонлик спортчиларнинг халқаро спорт ареналарида юксак ғалабаларга эришаётганида яққол намоён бўлмоқда. Бу галги турнир ҳам юқори савияда ўтишига ишончим комил».
Бу йилги турнирда Ўзбекистон шарафини тажрибали спортчилар билан бирга ёш дзюдочилар ҳам ҳимоя қилмоқда. Мусобақанинг дастлабки кунида Муҳриддин Тиловов шоҳсупанинг энг юқори поғонасига кўтарилган бўлса, Шарофиддин Лутфуллаев учинчи ўринни эгаллади. Хотин-қизлар ўртасида Диёра Келдиёрова кумуш, Нодира Гулова, Муқаддас Кубеева, Гулойим Жумабоева бронза медалларни қўлга киритди.
Мусобақанинг очилиш маросимида Ўзбекистон Республикаси Бош вазирининг ўринбосари А. Икромов сўзга чиқди.
