Ўзбекистон миллий терма жамоаси аъзоси Сардор Рашидов Осиё Чемпионлар Лигасининг финал учрашувида тўп сурадиган биринчи ўзбек футболчисига айланиши мумкин. Бунинг учун мусобақанинг ярим финалида «Ал-Жаиш» БААнинг «Ал-Айн» клубини мағлуб этиши керак.
Томонларнинг «Ал-Айн» майдонида бўлиб ўтган дастлабки ўйини мезбонларнинг 3:1 ҳисобидаги ғалабаси билан якунига етган бўлиб, қатарликларнинг ягона голига айнан Рашидов муаллифлик қилганди. Бугун — 18 октябрь куни ярим финалнинг жавоб ўйини «Ал-Жаиш» майдонида бўлиб ўтади.
Маълумот учун, Ўзбекистон клублари Осиё Чемпионлар Лигасининг ярим финалига қадар уч бор етиб келган. «Бунёдкор» 2008 ва 2012 йилги мавсумда бунга муваффақ бўлган, «Пахтакор» эса 2003 йилги мавсум ярим финалда ўйнаган. Мусобақанинг финал учрашувида тўп суриш ўзбекистонлик футболчилардан ҳеч бирига насиб қилмаган.
