«Насаф» - «Навбаҳор» (6:0) ўйинидан кейин ўтказилан матбуот анжуманида меҳмонлар устози Равшан Бозоров ўз фикрини маълум қилди.

Р.Бозоров: Ўйин ҳақида гап кетганида “Насаф” жамоаси учрашувда ҳақли равишда ғалабага эришди. Афсуски бизни ўйинимиз чиқмади. Бунга эса асосий таркибнинг олти нафар футболчисини майдонга тушмаганлиги сабаб бўлди. Уч нафар футболчимиз дисквалификация туфайли қолганлар эса жароҳат боис учрашувда иштирок эта олишмади. Уларнинг ўрнига ёшлар хизматидан фойдаланишга мажбур бўлдик. Ёшларимизда эса “Насаф”дек кучли жамоага қарши баҳсда тажриба етишмаганлиги сабабли анча қийналишди. Рақиб савия жиҳатидан анча кучли эди. Натижа ҳам шундан келиб чиқиб қайд этилди. Ёшларни асосий таркибда муносиб тарзда тўп суришлари учун маълум вақт керак бўлади. Жорий йилги мавсумда секин-аста эртамизни белгилаб берадиган футболчиларга имконият бериб келмоқдамиз. Бу ҳол ўз самарасини бериши лозим. Жамоамиз олдига олий лигада қолиш вазифаси қўйилган. Иккинчи даврада тақвимга кўра тўққизта учрашувни сафарда ўтказамиз. Имкон қадар учрашувларда очко олишга интилмоқдамиз. Лекин, бу борада осон бўлаётгани йўқ. Қайдадир ўйинимиз чиқмаяпти ёки бошқа сабаба туфайли очколарни бой бермоқдамиз. “Бухоро”га қарши ўз майдонимизда ўтган сўнгги ўйиннинг биринчи бўлимида устунликка эга бўлгандик. Танаффус пайтидаги четлатишлар сабаб иккинчи бўлимда имкониятни бой бердик. “Шўртан” билан ўтган баҳсда эса ғалаба қозонаётган бўлишимизга қарамай сўнгги сонияларда мағлубиятга учрадик. Хуллас нимадир етишмаяпти. Қолган турларда ижобий натижаларни қўлга киритишга ҳаракат қиламиз. “Навбаҳор” олий лигадан тушиб кетмайди деган умиддаман.