Испания профессионал футбол лигаси президенти Хавьер Тебас «Барселона» клуби билан боғлиқ вазиятга изоҳ бериб ўтди.

Каталонияликлар Тебасга нисбатан интизомий иш очишни сўраб спорт арбитраж судига мурожаат қилишди. Бунга Тебаснинг "Валенсия"га қарши ўйинда "Барселона" футболчиларини симуляцияда айблагани сабаб бўлди. "Кўк-анорранглилар" сўнгги дақиқада пенальтидан урилган голни нишонлаш чоғида мухлислар футболчилар устига сув солинган идишни улоқтирган ҳамда Суарес ва Неймар бошини ушлаб ерга қулаганди. Тебас ва унинг ходимлари «Барселона» футболчилари ушбу вазиятда симуляция ишлатган дея фикр билдиришганди.

Ўз навбатида «Барселона» президенти Хосеп Мария Бартомеу Тебасга стадиондаги зўравонликларни қўллаб-қувватмасликни маслаҳат берди.

«Зўравонлик масаласида улар адашишади. Агар кимдир зўравонлик ҳақида гапириш ҳуқуқига эга бўлса, бу — мен. Бартомеу ва кўп ОАВга шуни эслатмоқчиманки, ўз вақтида клубга нисбатан адолатсизлик қилинганида Месси, Росель ва Пике ҳимоя қилганман», — дейди Тебас.