Бугун Жанубий Корея терма жамоаси бош мураббийи Ули Штилике корейс ОАВлари учун матбуот анжумани ўтказди. Унда германиялик мутахассис журналистларнинг саволларига жавоб берди.

“Дастлаб 25 нафар футболчини чақирдим. Бизнинг қанот ҳимоямиз ва ҳужум чизиғимиз заиф. Шунинг учун ушбу чизиқларга 3 нафар янги футболчи чақирдим. Канада билан ўйинда синовдн ўтолмаган 2 нафар футболчига жавоб бериб юбораман”, деди Ули Штилике. “Парк Жу Хо жуда қийин даврни бошидан ўтказди. Ҳозир жамоасида ўз ўрнини топмоқда. Юн Сок Йонг Дания Кубоги доирасида ўйинда қатнашди. Яхши спорт формасида”.

Ўзбекистонга қарши ўйин ҳал қилувчи палла эканлиги ҳақида фикр сўраган журналистларга Ули Штилике шундай жавоб берди:

“Ўзбекистонга қарши ўйин муҳим. Аммо, ҳал қилувчи эмас. Олдинда яна 5та ўйин турибди. Ўтган 4та ўйинда ўзимизга ўхшамаган бўлсак-да, кейинги ўйинни фойдамизга ҳал қилсак ҳаммаси яхши бўлади”.

Ҳужум чизиғига жалб этилган Ли Жонг Хёб ҳақида немис мутаҳассиси шундай деди:

“Менда “А” ва “Б” режалар бор. Ли Жонг Хёб “А” режам. Ким Шин Ук эса “Б” режам. Ким Шин Ук Эронга қарши ўйинда суст ҳаракат қилди. Лекин Қатар билан ўйинда яхши ўйнади. Кўп тўп киритиш доим ғалаба дегани эмас. Менинг футбол фалсафам сал бошқача. Яъни, тўпни кўпроқ назорат қилиш ва имкониятлар яратиш”.

Терма жамоамиз 15 ноябрь куни стандартлардан эҳтиёт бўлиши керак бўлади. Эндиликда корейслар ҳужум чизиғида 186 смлик Ли Жонг Хёб ва 197 смлик Ким Шин Уклар бор.