Россия чемпионати вакили «Оренбург» клубининг яримҳимоячиси Вадим Афонин Ўзбекистон терма жамоасининг Иордания (10 ноябрь) ва Жанубий Корея (15 ноябрь) терма жамоаларига қарши ўйинларига чақирув олди.

29 ёшли футболчи сўнгги бор 2012 йили терма жамоага чақирилган ва Қувайтга (3:0) қарши ўртоқлик ўйинида 20 дақиқа тўп сурган эди.

Вадим Афонин 1987 йили Тошкентда туғилган. Фаолияти давомида «Трактор», «Шўртан», Россиянинг «Рубин» ва «Салют» клубларида ўйнаган. 2014 йилдан буён «Оренбург» (собиқ «Газовик») клуби таркибида тўп сурмоқда.

Айтиш жоизки, айнан «Оренбург» клубида Афониннинг ўйини очилиб кетди десак муболаға бўлмайди. Ўтган мавсумда у ўзининг меҳнати билан жамоасининг Премьер-лигага чиқишига катта ҳисса қўшди. Мавсум якунида эса ФНЛнинг энг яхши яримҳимоячиси деб топилди.

Жорий мавсумда ҳам Афонин «Оренбург»нинг асосий футболчиларидан бирига айланган. РФПЛнинг 12 туридан 11тасида майдонга тушган. Айни пайтда «Оренбург» 10 очко билан Россия чемпионатида 12-ўринда бормоқда ва бунда ҳамюртимизнинг хизматлари ҳам беқиёс.

Умид қиламизки, Вадим Афонин Ўзбекистон терма жамоасида ҳам ўйнаб кетиш имкониятини қўлдан чиқармайди.