Иордания терма жамоаси бош мураббийи Абдулла Абу Зимъа Ўзбекистон (0:1) терма жамоасига қарши ўйиндан сўнг уюштирилган матбуот анжуманида ўз фикрларини маълум қилди.
«Аввало, Ўзбекистон терма жамоасини ғалаба билан табриклайман. Умуман олганда ҳар иккала жамоанинг савияси тубдан фарқ қилади. Ўзбекистон ЖЧ-2018га бориш учун даъвогар бўлиб турибди, тайёргарлиги ҳам маромида экан.
Иордания эса янги тайёргарлик босқичини бошлади. Жамоамиз авлодлар алмашуви жараёнини ўтказмоқда.
4 кун ичида иккинчи ўйинда майдонга тушдик. Ироқ билан (0-0) дуранг ўйнаган эдик. Айнан шу таркибдан яна фойдаландик. Жамоамиз футболчилари ҳали ёш, уларни тажриба орттириб олиши учун жалб қилгандик.
Шунга қарамасдан, биз Ўзбекистон билан рақобатлаша олдик ва уларга нисбатан хавфлироқ ўйнадик.
Афсуски Ўзбекистон ўз вазиятидан фойдаланиб гол урди ва ғалаба қозонди. Ўйлашимча, бугунги ўртоқлик ўйинидан ҳар иккала терма жамоа ҳам тажриба орттириб олди» - Абу Зимъа.
