«Ливерпуль», «Челси» ва «Манчестер Сити» клублари бразилиялик футболчиларини қайтариш учун самолётни ижарага оладиган бўлишди.

Сешанба куни Бразилия терма жамоаси Перуда ЖЧ-2018 саралаш ўйинини ўтказади. Учрашувда Филиппе Коутиньо, Роберто Фирмино (ҳар иккаласи ҳам «Ливерпуль»), Давид Луиз, Виллиан (ҳар иккаласи ҳам «Челси») ва Фернандиньо («Манчестер Сити») иштирок этади. Учала клуб ҳам дам олиш кунлари АПЛнинг сафар ўйинида иштирок этиши сабабли, футболчиларини тезда орқага қайтариш муаммосига дуч келишмоқда.

Daily Mirror хабарига кўра, айнан шу мақсадда «Ливерпуль», «Челси» ва «Сити» клублари 120 минг фунтга самолёт ёллаб, ўйин тугаши биланоқ футболчиларини орқага қайтаришни мақсад қилган. Эндиликда, Перудаги ўйин тугагандан сўнг, беш нафар футболчи самолётга ўтириб, 12,5 соатлик парвоздан сўнг Англияга қайтиб келишади ва навбатдаги ўйинларга яхшироқ тайёргарлик кўриш имкониятига эга бўлишади.