Михаил Мудрикнинг допинг иши бўйича қандай жазо тайинлангани маълум бўлди. «Челси» ва Украина терма жамоаси вингери 2024 йилнинг ноябрь ойидан буён топширган допинг-тести ижобий натижа бергани сабабли майдонга тушмаётган эди.
Журналист Бен Жейкобснинг хабар беришича, Англия Футбол ассоциацияси (FA) футболчини 4 йилга футболдан четлаштирди — бу мумкин бўлган энг юқори жазо муддати ҳисобланади. Мудрикнинг вакиллари ушбу қарор устидан Лозаннадаги Спорт арбитраж судига (CAS) апелляция берди.
CAS футболчи томонидан мурожаат бўлганини ва унинг дисквалификация муддати ҳақидаги маълумотни тасдиқлади. Эслатиб ўтамиз, футболчининг қонида тақиқланган мельдоний моддаси топилган эди.
