Бугун VI Ўзбекистон Биринчилиги ниҳоясига етди. Гулнора Тўраева бошчилигидаги “Севинч-2″ жамоаси бу йилги мавсумда 2-ўринни эгаллади.
“Севинч-2″ бугун мавсумнинг сўнгги учрашувида биринчилик етакчиси Термизнинг “Сурхан ТерДу” жамоаси билан баҳс олиб бордди ва рақибларини 2:1 ҳисобида мағлубиятга учратишди.
Шуниси диққатга сазоворки, “Севинч-2″ ўтган йилги мавсумда биринчиликни 6та жамоа ичида сўнгги 6-ўрин билан кифояланган эди. Бу йил ёш футболчи қизларимиз катта ўсишга эришди. Уларда нафақат маҳорат балки асосий жамоадаги каби курашувчанлик характер ҳам шаклланганига гувоҳ бўлаяпмиз. Демак, ёшларимиздан муносиб ўринбосарлар етишиб чиқмоқда. Албатта бу қувонарли ҳол.
Шуни ишонч билан айтиш мумкинки, “Севинч” клуби четдан футболчи қидирмайди, бўлажак футболчилар, мураббийларимизнинг катта меҳнатлари орқали ана шундай вояга етаверади. Клубимизнинг бу муҳим стратегияси давом этмоқда.
Гулнора Тўраева шогирдлари бўлмиш “Севинч-2″ ўтган мавсумда 30та ўйин ўтказиб, 2 ғалаба, 9 дуранг ва 19 мағлубият қайд этиб, натижада 15 очко тўплашган бўлишса, бу йилги мавсумда 22та ўйин ўтказиб, 10та ғалаба, 7та дуранг ва 5та мағлубият натижани қайд этишди. Ёш футболчи қизларнинг тўплаган очколари сони 37тага тенг бўлди. Қизлар рақиблари дарвозасини 37 марта ишғол қилишиб, ўз дарвозаларидан 15та тўп олиб чиқишди. Бу асосан 14-15 ёшдаги футболчиларимиз учун жуда яхши кўрсаткичдир.
