Ўзбекистон Миллий Паралимпия Ассоциацияси Халқаро мусобақаларга, жумладан, 2018 йилда Индонезиянинг Жакарта шаҳрида бўлиб ўтадиган ёзги ПараОсиё Ўйинларига муносиб тайёргарлик кўриш ҳамда вилоятларда селекция қилинган спортчиларни саралаш мақсадида жорий йилнинг 17-18 ноябрь кунлари Тошкент шахрида Ўзбекистон Паралимпия Ўйинларини ўтказди. Бу ҳақда МОҚ ахборот хизмати хабар берди.

Тошкент шаҳридаги Паралимпия марказида Республикамизнинг барча вилоятлари паралимпия спортчилари ўртасида дзюдо спорт тури бўйича мусобақада 100га яқин паралимпиячилар (-60, -66, -73, -81, -90, -100, +100 вазн тоифасида ўғил болалар -48, -52, -56, -63, -70, +78 вазн тоифасида қиз болалар) совринли ўринлар учун куч синашдилар.

Тошкент шаҳридаги Олимпия захиралари коллежида Республикамизнинг барча вилоятлари паралимпия спортчилари ўртасида енгил атлетиканинг югуриш (60 м., 400 м., 800 м.), узунликка сакраш, ядро ва найза отиш бўйича бўлиб ўтган мусобақада 60 нафар паралимпиячи совринли ўринлар учун куч синашдилар.

Тошкент шаҳридаги Ихтисослаштирилган сув спортини ривожлантириш Республика марказида республикамизнинг барча вилоятлари паралимпия спортчилари ўртасида сузишнинг баттерфляй, чалқанча, эркин ва брасс сузиш турлари бўйича бўлиб ўтган мусобақада 20дан ортиқ паралимпиячилар совринли ўринлар учун куч синашдилар.

Тадбир сўнгида Ассоциация томонидан ғолиблар эсдалик совғалари билан тақдирландилар.