Шахмат бўйича жаҳони чемпиони унвони учун россиялик гроссмейстер Сергей Карякин ва амалдаги чемпион Магнус Карлсен (Норвегия) ўртасидаги еттинчи партия ҳам дуранг билан якунланди.

АҚШнинг Нью-Йорк шаҳрида бўлиб ўтаётган нуфузли мусобақанинг аввалги 6та баҳсида ҳам ғолиб номи аниқланмаганди. Еттинчи ўйинда Карякин оқ доналарда ўйнади. Томонлар 33-юришдан кейин дурангга имзо чекишди.

Натижада умумий ҳисоб 3,5:3,5 бўлиб турибди. Саккизинчи партия бугун ўтказилади. Бу сафар оқ доналарда Карлсен ўйнайди.

55-шахмат тожи учун баҳс 12та классик партиядан иборат бўлади. Унда 6,5 очко жамғарган шахматчи ғолибликни қўлга киритади. 12та партиядан кейин ҳисоб тенг бўлса, қўшимча тай-брейк белгиланади ва унда шахматчилар тезкор партияда ўз омадларини синаб кўришади.