«Олд Траффорд» стадиони хавфсизлик хизмати ходимлари АПЛ 12-туридан ўрин олган «Манчестер Юнайтед» - «Арсенал» ўйини олдидан ўйинга чиптасиз кирмоқчи бўлган 2 талабани қўлга туширишди.
The Telegraph хабарига кўра, мухлислар жума куни экскурсия мақсадида стадионга келган ва ҳожатхонага кириб яширинишган. Тунни шу ерда ўтказиб, эртасига ўйинга чиптасиз кирмоқчи бўлган.
Шанба куни, ўйиндан олдин стадион текширилаётган маҳалда стадион ходимлари уларни ушлаб олган ва полицияга топширган. Талабалар ўйинга кириш учун чипта олишнинг имконияти йўқлиги туфайли шу ишга қўл урганини тушунтиргандан сўнг полиция уларни қўйиб юборган.
«Манчестер Юнайтед» клуби талабаларнинг тутган йўлини қоралаб чиққан, аммо улар хавфсизликка таҳдид қилишмаганини, чунки стадионга киришдан олдин метал изловчи мосламадан ўтишганини қайд этган.
