Футбол бўйича ЖЧ–2018 мезбонлик қиладиган Россия шаҳарларида транспорт тиғизлигига тайёргарлик кўрилмоқда. Бу ҳақда «Транспортная дирекция –2018» автоном нотижорат ташкилоти бош директори Алексей Петров маълум қилди, деб хабар бермоқда «ТАСС».

Футбол мухлисларини ҳудудларда қабул қилиш ишлаб чиқилган режага асосан ишқибозланинг максимал ҳисоби инобатга олинган ҳолда бўлиб ўтади.

«Операцион режанинг дастлабки варианти яратилди ва у барча муассаса ва транспорт вазирлиги томонидан маъқулланди. Биз турли вариантлар ишлаб чиқдик, аммо қайси шаҳарларда муҳим ўйинлар ўтказилишини билмаймиз. Шунга қарамай, ҳар бир шаҳарда муҳим ўйин ўтказилишига тайёрланамиз», – деди Алексей Петров.

Бундан ташқари, ЖЧ–2018 ўтадиган 6 та шаҳарнинг аэропортида керакли инфратузилма ишлаб чиқилди.

«Кўп ишлар қилинди. Самара, Екатеринбург, Волгоград, Нижний Новгород шаҳарларида авиатерминаллар йўловчиларни қабул қилмоқда. Москвадаги ‘Внуковў ва ‘Домодедовў аэропортларида инфратузилма объектлари реконструкция қилинди. Санкт-Петербургда яқиндагина янги терминал қуриб битказилди. Ишонч билан айтиш мумкинки, ушбу шаҳарлар аэропорт нуқтаи назаридан тайёр», – дея қўшимча қилди «Транспортная дирекция –2018» раҳбари.

Маълумот учун, жаҳон чемпионати 2018 йилнинг 14 июнидан 15 июлига қадар, Россиянинг 11 шаҳри – Москва, Санкт-Петербург, Нижний Новгород, Волгоград, Ростов-Дон, Самара, Екатеринбург, Қозон, Калининград, Саранск ва Сочида жойлашган 12 стадионда бўлиб ўтади.