«Олмалиқ» клуби раҳбариятида ўзгаришлар содир бўлди, аммо бош мураббий Игорь Шквирин жамоани тарк этмаган, деб хабар бермоқда кулбнинг расмий сайти.
"2008 йилдан буён жамоа бош директори бўлиб ишлаётган Валерий Николаевич Биков нафақага кузатилди. Унинг ўрнига вақтинча бош директор вазифасини бажарувчи этиб Ибрагим Ҳайдарович Юлдашев тайинланди.
Шу кунларда жамоа атрофида пайдо бўлган миш-мишларга Ибрагим Юлдашев қуйидагича изоҳ берди. "Олмалиқ" футбол клубида айни дамда бош директор ўзгарди. Игорь Анатольевич Шквирин жамоа бош мураббийлигида турибди. Бирор ўзгариш бўлса футбол клуби раҳбарияти расман маълум қилади" - дейилади клубнинг расмий сайти хабарида.
Аввалроқ, «Олмалиқ» клубига Виктор Кумиков бош мураббий қилиб тайинлангани ҳақида хабарлар чиққан эди.
