24-30 ноябр кунлари Тошкент вилояти Бекобод шаҳридаги “Ёшлик” спорт мажмуасида бокс бўйича катталар ўртасида Ўзбекистон чемпионати бўлиб ўтди. Ўзбекистон чемпионатида мамлакатимизнинг барча вилоятлари, Қорақалпоғистон Республикаси ва Тошкент шаҳридан ташриф буюрган 20 жамоа таркибида 215 нафардан ортиқ боксчи ғолиблик учун рингга кўтарилди.
Бу йилги Ўзбекистон чемпионати иштирокчилари орасида Бразилия мезбонлик қилган Олимпия ўйинлари, жаҳон ва қитъа миқёсидаги нуфузли турнирларнинг ғолиб ва совриндорлари борлиги беллашувларнинг кескин ва муросасиз ўтишини таъминлади.
Якунда ўз вазн тоифасида барча рақибларини енгган, Ҳасанбой Латибоҳунов (52 кг), Нодир Мирзаҳмедов (49 кг), Абдулҳай Шораҳматов (56 кг), Улуғбек Комилов (60 кг), Элнур Абдураимов (64 кг), Бобоусмон Ботуров (69 кг), Исроил Мадримов (75 кг), Зуҳриддин Маҳкамов (81 кг), Бобур Йўлдошев (91 кг) ҳамда Баҳодир Жалолов (+91 кг) Ўзбекистон чемпиони деган шарафли номга сазовор бўлди.
Ўзбекистон чемпионатида ғолиб ва совриндор бўлган истеъдодли спортчилар келаси йили халқаро мусобақаларда мамлакатимиз шарафини ҳимоя қиладилар.
