Adidas Енгил атлетика федерациялари халқаро ассоциацияси (IAAF) билан ҳамкорликни тўхтатди. Бу ҳақда компания раҳбарияти маълум қилди, дея хабар беради «ТАСС».
«Тижорий муносабатларимиз 2016 йил тугаши билан якунига етади. Музокаралар чоғида икки томон ҳам шундай қарорга келди. Adidas сермаҳсул ва юқори профессионал даражадаги ҳамкорлик учун IAAF’га миннатдорлик билдиради ва халқаро ассоциацияга келгусидаги фаолиятида муваффақиятлар тилайди», — дейилади корпорация раҳбарияти баёнотида.
Ассоциациянинг Adidas билан шериклик келишуви 2008 йилда тузилган ва 2019 йилгача мўлжалланганди. Ғарб спорт шарҳловчиларига кўра, шартноманинг бекор қилиниши IAAF дуч келган допинг ва коррупциявий можаролар билан бевосита боғлиқ.
Adidas билан ҳамкорликнинг тўхтатилиши ассоциация ўнлаб миллион евро йўқотишига олиб келади.
