Санкт-Петербургнинг «Зенит» футбол клуби футболчиси Александр Кокорин «Давай, давай» хайрия акцияси доирасида шаҳардаги кафелардан бирида кулчалар сотувчиси бўлиб ишлади. Бу ҳақда TJournal хабар бермоқда.
Акция ташкилотчилари шу йўл орқали қиммат операцияларга муҳтож болалар учун маблағ жамғаради.
«Давай-давай» хайрия лойиҳаси 2015 йилнинг январь ойида старт олган. Аввалроқ «Зенит» футболчиларидан Халк (айни дамда «Шанхай СИПГ» аъзоси) Невский катта кўчасида қўшиқ куйлаб, рақсга тушган бўлса, Доменико Кришито циркда чиқиш қилди.
Шунингдек, Мигель Данни сартарош, Юрий Лодигин Эрмитажда экскурсиячи, Артём Дзюба трамвай кондуктори, Маурисио эса таксичи бўлиб ишлаган.
